काठमाडौ, प्रधानमन्त्री माधवकुमार नेपालले महिला हिंसाका घटनामा राजनीतिक दलहरु संरक्षक बन्ने गरेको आरोप लगाएका छन् । उनले त्यस्ता हिंसाका घटनामा राजनीतिक दल संरक्षक नबने ५० प्रतिशत घटनामा कमी आउने बताएका छन् ।

 राजधानीमा बुधबार आयोजित 'लैगिंक हिंसाविरुद्ध वर्ष सन् २०१०' को घोषणा एवं कार्ययोजना सार्वजनिक कार्यक्रममा बोल्दै उनले महिलाविरुद्ध हुने हिंसाका २५ प्रतिशत घटनालाई सरकारी संयन्त्रले सोझै कारबाही गरेर घटाउन सक्ने बताए ।

 उनले समाजमा रहेको पुरातन विचार, धर्म, संस्कृति र धारणाका कारण हुने हिंसाका करिब २५ प्रतिशत घटनालाई सचेतना र जागरणका कार्यक्रम सञ्चालन गरेर त्यसलाई न्यूनिकरण गर्न सकिने बताए ।

 उनले महिला हिंसासम्बन्धी घटनालाई नियन्त्रण गर्न अहिलेको संयन्त्रले पर्याप्त काम गर्ननसकेको गुनासो गर्दै प्रधानमन्त्री कार्यालयमा पैसा तिर्न नपर्ने टेलिफोन जडित नयाँ डेस्क स्थापना गरिएको जानकारी दिए । उनले भने -'प्रधानमन्त्री कार्यालयमा स्थापना गरिएको उक्त टोल फी नम्बर ११११ मा सोझै टेलिफोन गरेर पीडितले उजुरी गर्नसक्छन् ।'

 उनले सूचना सम्प्रेषणका लागि अलग्गै वेबसाइट खोलिने जानकारी दिदै सबै जिल्लामा प्रजिअको संयोजकत्वमा लैगिंक हिंसा नियन्त्रण समिति गठन गर्ने, गाविस र नगरपालिकामा कानुनी लैगिंक संवेदनशीलतासम्बन्धी तालिम दिइने तथा सरकारले लैगिक हिंसा निवारण कोष स्थापना गर्ने घोषणासमेत गरे ।

 उनले हिंसापीडित तथा प्रभावितहरुको संरक्षण र सुरक्षाका लागि १५ जिल्लामा तुरुन्तै सेवाकेन्द्र सञ्चालन गर्न महिला, बालबालिका तथा समाजकल्याण मन्त्रालयलाई निर्देशन दिए ।राष्ट्रिय महिला आयोगका अध्यक्ष नैनकला थापाले मुलुकभित्र थुप्रै महिला सत्ता र पैसाको आडमा बलात्कृत भएको र विदेशका कोठीहरुमा पुगेका हजारौं चेली नारकीय जीवन बिताउन बाध्य भइरहेको बताइन ।(