एकीकृत नेकपा माओवादीले मध्य र सुदूर पश्चिमाञ्चलका पहाडी जिल्लामा फैलिएको झाडापखालाबाट हालसम्म चारसय भन्दा बढिको मृत्यु भएको दावी गरेको छ । एकसाता देखि प्रभावित क्षेत्रमा रहेको माओवादीको एकीकृत जनस्वास्थ्य अभियान टोलीले दिएको जानकारीअनुसार चार महिनायता ४ सय २५ जनाको मृत्यु भएको छ ।

एक सातादेखि प्रभावित क्षेत्रमा रहेको माओवादी सभासदहरुसहितको टोलीले नयाँ तथ्याङ्क सार्बजनिक गरेको हो । सरकारले सार्बजनिक गरेको तथ्याङकमा करीब तीन सय जनाको मात्र मृत्यु भएको उल्लेख छ ।

जनस्वास्थ्य अभियान टोलीले प्रभावित क्षेत्रमा दैनिक पाँचदेखि सातजनाको मृत्यु हुने गरेको, औषधी र चिकित्सक अभाव भएको, जनचेतानमूलक कार्यक्रम नभएको जनाएको छ । एकीकृत नेकपा माओवादीका प्रवक्ता दीनानाथ शर्माले सरकारले सार्बजनिक गरेको तथ्याङकले रोग नियन्त्रणमा गम्भीर नभएको पुष्टि भएको बताउनुभयो । ’रोग नियन्त्रणमा सरकारी पहुँच पुगेको छैन,’ प्रवक्ता शर्माले भन्नुभयो, ‘झाडापखालाबाट मर्नेको संख्यासमेत थाहा नपाएको सरकार रोग नियन्त्रणमा गम्भीर नभएको पुष्टि गर्छ ।’

एकीकृत जनस्वास्थ्य अभियानलाई थप सशक्त बनाउने विषयमा छलफल गर्न एकीकृत माओवादी पदाधिकारीहरुको बैठक पार्टी कार्यालय कोटेश्वरमा बसीरहेको छ । स्थलगत भ्रमणपछि फर्कीएको टोलीले रोग प्रभावित जिल्लाको अवस्थावारे आज अपरान्ह पत्रकार सम्मेलन गरि जानकारी दिने माओवादीले जनाएको छ ।