कोरियालीसँग भएको नक्कली विवाह 'पेपर म्यारिज'मा नेपालीले समस्या भोगिरहेको समाचार आइरहेका बेला सक्कली विवाह गर्नेले पनि उस्तै कठिनाइ भोगिरहेको तथ्य फेला पर्न थालेका छन्। कोरियाली पुरुषसँग विवाह गरी उनीहरुसँगै जीवन बिताउने उद्देश्यले यहाँ आएका किरिब दुई दर्जन नेपाली महिलाले आफू ठूलो समस्यामा परेको बताउँदै कोरियामा रहेका संघसंगठनका प्रतिनिधिसँग सहयोगको आग्रह गरेका छन्।

नेपाली सम्पर्क समिति कोरियाका अध्यक्ष डेविट राईका अनुसार यसरी सम्पर्क गर्नेमध्ये कतिपयको अवस्था अति जटिल छ। सम्पर्क गरेका महिलामध्ये केहीले श्रीमानबाटै घरेलु हिंसा भोगिरहेका छन्। कतिले सासुबाट दुव्र्यवहार खेपिरहेका छन्। घरमा बन्दीजस्तै बस्नुपर्ने, रुचिअनुसार खानपान उपलब्ध नहुने, आफन्तसँग फोन संवाद गर्न नपाउनु अधिकांशको साझा समस्या हो । 'तँलाई ४ करोड वान तिरेर ल्याएको हो। बाहिर गएर घर आइनस् भने के गर्ने ? श्रीमान् सासुले आफूलाई सँधै घरमा बन्दीजस्तै बनाउने गरेको बताउँदै एक महिलाले पोखेको दुख उद्धृत गर्दै अध्यक्ष राईले भने- 'एक दिन होइन दुई दिन होइन सँधै घरमै थुनिएर बस्न निकै कठिन हुन्छ।' अधिकांश महिलाले नेपालमा सम्पर्क गर्न नपाउँदा कोरियामा रहेका साथीभाइ भेट्न नपाउँदा नरमाइलो लाग्ने बताएका छन्।

कोरियाको राजधानी सोलदेखि निकै टाढा देगुमा समस्या भोगिरहेकी महिलालाई सम्पर्क समितिले सोलको दोङदेमुनमा रहेका एक नेपाली आफन्तकहाँ पुर्याएको छ । थापा क्षेत्री थरकी अर्की एक महिलालाई सासुले मंगोलियन अनुहार नभएको भनी घृणा गर्ने गरेकी छिन्। नेपालमा सम्बन्धविच्छेद गरेर आएकी एक बच्चाकी यी आमाले यहाँ सम्बन्धविच्छेद गरिसकेका श्रीमानसँग विवाह गरेकी थिइन्। अहिले उनलाई कोरियाली सासू-श्रीमानले सम्बन्धविच्छेद गर्न दबाब दिइरहेका छन्। नेपालमै पहिलो विवाह विच्छेद गरेकी यी महिला अब पुनः वैवाहिक जीवन टुक्र्याउन चाहन्नन्।

लमजुङ घर भई ७० वर्षीय कोरियाली पुरुषसँग विवाह गरेकी ३० वर्षीय अर्की एक महिलाले आफूलाई आएको ९ दिनदेखि नै वृद्ध श्रीमानले पिट्न थालेको जनाएकी छन्। अर्की एक महिलाले आफूलाई उद्धार नगर्ने हो भने आत्महत्या गर्ने चेतावनी दिएकी थिइन्। २ सय ३७ नेपाली महिला र १ सय २७ पुरुषले कोरियालीसँग विवाह गरेको तथ्यांक देखिएको छ। यीमध्ये केही नक्कली विवाहअन्तर्गत र केही सक्कली विवाहमार्फत आएका छन्।

विवाह नै गराउने एउटा धर्म पनि छ। सन म्योङ मुनले खोलेको युनिफिकेसन चर्चअन्तर्गत पनि नेपालीले कोरियालीसँग विवाह गरेका छन्। श्रीमानसँगको उमेर भिन्नता फरक, खानपान तथा सांस्कृतिक असमानता पनि ठूलो समस्या भएको महिलाले बताएका छन्। नागरिक दैनिकवाट